لما تحب تاني
ابقي قول لها
ماتصدقينيش اوى
كل اللي صدقوني قبلك
انجرحوا
قول لها مهما عملت ليكي
دا لانك تستحقيه
أو عايز اعيش لحظات منحوتة معاكي
مش معني إني أعيشك دا
اني الرجل الاسطورة
لأن ممكن في لحظة
بعدي يكون الاسطورة
قول لها
اللي قبلك عصرت قلبها نيل
يصب فيا كل يوم الصبح
ويجري مني كل يوم بالليل
يصب في حضنها
تكبر ورودنا في الخفا
في عز لحظات حبنا
قتلت معني الورد في عيونها
وخطفت معني الفرح منها
وسيبت اسمي منحوت في حضنها
قولها ماتعتمديش عليا في شيء
ماتسألينيش هتلبسي ايه وانتي خارجة
ماتشوفيش الدنيا بعنيا
عشان لما نبعد ماتتعميش
ماتكلمهاش عن فكرة الغزو والخضوع
اللي قال عليها عادل صادق
ماتكلمهاش عن الحب الافلاطوني
ماترميهاش في بير وجع
زى اللي رميتني فيه
ماتحكيلهاش تفاصيلك ورفرفتك علي ناسك
ماتحكيش عن مشاهد رحمتك بالناس
عشان لما تقسي عليها ماتتصدمش
صدمة تهدها
كفاية كل الهدد اللي بتسيبه وراك
بعد ماتبني بكل مافيك
قولها ماسابتش فيا غير اللي بيني وبينها
لو قابلاني وانا بتاعها
اعذريني لما اناديكي باسمها
قولها تحافظ عليك لاني معنديش اغلي منك
ولاني سايبة روحي فيك
لما ابقي موت هي هتشوفك علي حقيقتك
لانها هتشوفك وانا مش فيك
روحي وهي طالعة هتاخد منك كل اللي عشناه سوا
وهتديها فرصة تلعب في الرمل علي شطك
لو قدرت تبني البيت
حاسب ابوك يهده
حاسب يهادوك بالبحر
علي رسمتكم فتموت علطول
تعليقات